Privatësia · 6 tetor 2026

Privatësia në Lexojmë

Kur zgjedh «Fillo falas», mëson me një profil vetëm në pajisje. Hyrja me kod përdor një llogari të veçantë. Këto dy mënyra nuk i ruajnë dhe nuk i ndajnë të dhënat në të njëjtën mënyrë.

Fëmijët mund ta lexojnë versionin e shkurtër te Privatësia për fëmijë.

Ky përditësim shpjegon funksionimin e aplikacionit. Baza ligjore, afatet e regjistrave teknikë dhe marrëveshjet me ofruesit kërkojnë verifikim përpara se njoftimi të konsiderohet përfundimtar.

Mësimi falas, pa kod

Fëmija shkruan një nofkë dhe zgjedh një figurë. Kërkojmë që të mos përdorë emrin e plotë. Nuk kërkojmë e-mail, datëlindje ose fjalëkalim në këtë hyrje. Profili nuk është llogari online dhe nuk ka kod për pajisje të tjera.

Nofka, figura, cilësimet, përgjigjet dhe përparimi ruhen në shfletues për të vazhduar mësimin dhe për të zgjedhur ushtrimet e radhës. Ato nuk ngarkohen në bazën e të dhënave nga ky profil dhe nuk shfaqen në raportet e prindit, mësuesit ose në statistikat e përdorimit të administratës. Nuk përdorim gjurmim reklamash për këtë hyrje.

Ruajtja dhe fshirja në pajisje

Përdor të njëjtin shfletues dhe pajisje për të vazhduar. Të dhënat lokale nuk kanë afat automatik fshirjeje. Për t’i hequr, përdor «Cilësimet → Rivendos të dhënat» ose fshi të dhënat e faqes në shfletues.

Edhe dalja ose ndërrimi i përdoruesit mund ta fshijë profilin lokal. Nuk kemi kopje në server për ta rikthyer. Hyrja më pas me një kod nuk e transferon automatikisht përparimin lokal te llogaria me kod. Në pajisje të përbashkët, personat që përdorin të njëjtin shfletues mund ta shohin profilin lokal.

Lidhja me internetin dhe skedari i hyrjes

«Vetëm në pajisje» vlen për profilin dhe mësimet, jo për çdo kërkesë teknike. Faqet, figurat dhe zëri i ushtrimeve ngarkohen nga interneti. Ofruesi i hostimit, Vercel Inc., mund të përpunojë adresën IP dhe të dhënat teknike të kërkesës për funksionim dhe siguri.

Përdorim një cookie të domosdoshme për modalitetin e fëmijës. Ajo nuk përmban emrin ose përparimin. Skadon pas 12 orësh dhe mund të rinovohet kur hapet përsëri mësimi. Skadimi i saj nuk e fshin përparimin lokal. Afatet konkrete të protokolleve të hostimit ende duhet të verifikohen; afatet e pilotit shkollor më poshtë nuk vlejnë automatikisht për to.

Hostimi dhe vendndodhja e të dhënave

Përditësim i vendndodhjes, 6 tetor 2026: funksionet e rregullta të serverit të app.lexojme.com ekzekutohen në Dublin, Irlandë (BE). Funksioni teknik i Vercel që drejton kërkesat përpara hapjes së faqeve mbetet i shpërndarë globalisht. Baza kryesore e të dhënave për llogaritë online, që shërbehet nga Supabase Pte. Ltd., ndodhet në Irlandë (BE). Profili falas në pajisje mbetet në shfletues.

Vercel Inc. është ofrues me seli në SHBA dhe përdor një rrjet global për shpërndarjen e faqeve, figurave dhe zërit. Regjistrat teknikë, mbështetja dhe nën-përpunuesit e ofruesve mund të përfshijnë përpunim në vende të tjera, përfshirë SHBA-në. Vendndodhja e serverit nuk garanton që çdo përpunim bëhet vetëm në BE.

Ky sqarim i vendndodhjes nuk ndryshon qëllimet e përdorimit, të dhënat që mbledhim ose rregullat e qasjes. Njoftimi i pilotit në Istog më poshtë ruan versionin dhe datën e tij. Kontratat dhe kushtet për dërgimin e të dhënave jashtë Kosovës mbeten për verifikim.

Llogaritë online dhe të rriturit

Zgjedhja e një emri loje nuk është pëlqim prindëror dhe nuk krijon llogari online. Rruga e prindit kërkon kontrollet e të rriturit dhe autorizimin për fëmijën; rruga e shkollës kërkon një mësues të autorizuar dhe lidhjen me klasën. Profili lokal nuk i anashkalon këto kontrolle. Nuk kërkohet blerja e një abonimi për të dhënë pëlqim.

Kur përpunimi mbështetet në pëlqim dhe fëmija është nën 16 vjeç, ligji i Kosovës kërkon pëlqimin ose autorizimin e prindit apo kujdestarit dhe përpjekje të arsyeshme për verifikim. Një klikim nga fëmija nuk e zëvendëson këtë. Për shkollën duhet përcaktuar baza ligjore përkatëse, jo supozuar se çdo përdorim mbështetet në të njëjtin pëlqim. Ligji nr. 06/L-082, neni 7.

Statistikat e përdorimit të llogarive online

Për të kuptuar sa përdoret Lexojmë, regjistrojmë ditën e përdorimit, një identifikues të brendshëm të llogarisë dhe fushën: fëmijë, prind ose mësues. Disa pajisje me të njëjtën llogari numërohen një herë. Profili falas vetëm në pajisje dhe përdorimi pa internet nuk përfshihen.

Sinjali i aktivitetit dërgohet vetëm kur aplikacioni është i dukshëm dhe është përdorur gjatë pesë minutave të fundit. «Aktiv tani» përdor sinjalet e 45 sekondave të fundit; kjo nuk provon se personi po mëson. Nuk ruajmë në këto statistika adresën IP, identifikuesin e pajisjes, faqet e vizituara, tekstet, përgjigjet ose lëvizjet e përdoruesit.

Vetëm administratorët e autorizuar shohin numrat e përmbledhur. Të dhënat ditore mbahen për 400 ditë kalendarike; fshirja automatike ditore heq ditët më të vjetra dhe sinjalet e skaduara të aktivitetit. Fshirja e llogarisë heq edhe statistikat e saj. Nuk rindërtojmë përdorimin para fillimit të matjes.

Kontakti për hyrjen pa kod

Shërbimin e ofron LEXOJMË SH.P.K, NUI 812453679, Bejtush Podjeva, 9 - Podujevë, Kosovë. Për pyetje për të dhënat, kërkesa për të drejtat e tua ose ndihmë për fshirje, shkruaj në info@lexojme.com. Mos dërgo emrin, kodin ose përparimin e fëmijës në një kërkesë të parë.

Piloti shkollor në Istog · Për miratim

Istog · Klasa e parë · Për miratim 2 · 6 shtator 2026. Pjesa në vijim vlen vetëm për pilotin e klasës së parë në Istog, jo për profilet që ruhen vetëm në pajisje ose për çdo shkollë tjetër. Deri në nënshkrimin e marrëveshjeve dhe miratimin e vlerësimit të rrezikut, ky pilot nuk fillon me të dhëna reale të fëmijëve.

1. Kush është përgjegjës

Për të dhënat shkollore, Komuna e Istogut, përmes Drejtorisë së Arsimit dhe shkollave pjesëmarrëse, është kontrolluesi. Kjo do të thotë se Komuna vendos pse përdoren të dhënat dhe cilat rregulla duhet të ndiqen. Shkollat dhe mësuesit veprojnë vetëm me autorizimin e Komunës.

Kontrolluesi: Komuna e Istogut
Njësia përgjegjëse: Drejtoria e Arsimit
Adresa: Rruga Fadil Ferati, 31000 Istog, Kosovë
Kontakti zyrtar: Naim Behlulaj, Drejtor i Drejtorisë së Arsimit
Posta elektronike: naim.behlulaj@rks-gov.net
Telefoni: +383 49 629 800

Për këto të dhëna, LEXOJMË SH.P.K, Shoqëri me Përgjegjësi të Kufizuar, është përpunues. Kjo do të thotë se Lexojmë e mban dhe e përdor informacionin vetëm sipas udhëzimeve me shkrim të Komunës. Lexojmë nuk lejohet ta përdorë progresin e fëmijëve për qëllime të veta.

Përpunuesi: LEXOJMË SH.P.K
Numri Unik Identifikues: 812453679
Adresa: Bejtush Podjeva, 9 - Podujevë
Shteti: Kosovë
Kontakti për privatësinë: info@lexojme.com

Lexojmë është kontrollues më vete vetëm për kontaktet e veta të kontratës, faturat, kërkesat që i dërgohen drejtpërdrejt dhe sigurinë e llogarisë së vet. Marrëveshja me Komunën duhet ta konfirmojë këtë ndarje para fillimit të pilotit.

Komuna, si institucion publik, duhet të caktojë personin zyrtar për mbrojtjen e të dhënave dhe ta publikojë kontaktin e tij. Ky kontakt nuk është gjetur në faqen zyrtare dhe duhet të shtohet para miratimit të këtij njoftimi.

2. Cilat të dhëna përdoren dhe prej kujt vijnë

Fëmija: emri ose nofka, klasa e parë, identifikuesi i figurës së zgjedhur, kodi i nxënësit dhe numrat e brendshëm të profilit, shkollës, klasës dhe mësuesit. Viti i lindjes mund të ruhet teknikisht, por rrjedha aktuale e shkollës nuk e dërgon. Ngjyrat e zgjedhura nuk ruhen.
Mësimi: ushtrimet, përgjigjet, tentimet, ndihmat, gabimet, koha e punës, saktësia, progresi, fjalët, shkronjat, seritë, shpërblimet, certifikatat dhe testet e leximit.
Të rriturit: emri, posta elektronike, roli, shkolla, klasa dhe lidhja e autorizuar me fëmijën. Për një ftesë prindi ruhen edhe gjendja e ftesës, koha dhe prova e konfirmimit nga shkolla.
Provat ligjore: versioni i njoftimit ose autorizimit, koha e pranimit dhe, kur nevojitet për siguri, adresa e internetit dhe lloji i shfletuesit të pajisjes.
Teknika dhe ndihma: skedari i domosdoshëm i hyrjes në pajisje, koha e kërkesës, lloji i pajisjes, regjistrat e sigurisë ose gabimeve dhe mesazhet për zgjidhjen e një problemi.

Të dhënat vijnë nga Komuna, shkolla, mësuesi, prindi ose kujdestari, nga përdorimi i ushtrimeve prej fëmijës dhe nga pajisja gjatë funksionimit të sigurt të aplikacionit. Lexojmë nuk merr të dhëna për fëmijën nga reklamat ose nga tregtarë të të dhënave.

Për punë pa ndërprerje, pajisja mund të mbajë lokalisht një kopje të profilit, progresit, figurës dhe punës së padërguar. Kodi tani i heq këto të dhëna pas daljes, ndërrimit të përdoruesit dhe pas 15 minutash pa veprim. Para fillimit me të dhëna reale, kjo duhet të provohet në çdo lloj tableti që do të përdorë shkolla.

3. Çfarë nuk mbledhim

Kamera përdoret vetëm kur zgjidhet skanimi i kodit të hyrjes. Skanimi bëhet në pajisje. Lexojmë nuk ruan fotografi ose video të fëmijës.

Gjatë mësimit luhen skedarë audio të përgatitur më parë. Lexojmë nuk regjistron zërin e fëmijës. Teksti i ushtrimit nuk dërgohet te një shërbim zanor gjatë përdorimit të fëmijës.

Piloti shkollor nuk ka pagesë nga fëmija, reklama, gjurmim reklamash ose shitje të të dhënave. Lexojmë nuk ruan numra të kartave bankare.

4. Pse lejohet përdorimi i të dhënave

Mësimi dhe raporti për mësuesin: për detyrën publike të arsimit të Komunës, sipas nenit 5, paragrafi 1.5 të Ligjit numër 06/L-082 dhe kompetencave komunale në nenet 4 dhe 5 të Ligjit numër 03/L-068. Komuna duhet ta miratojë pilotin me shkrim para përdorimit të të dhënave reale.
Llogaritë, klasat dhe siguria: për të njëjtën detyrë publike dhe për detyrimet ligjore të sigurisë, sipas nenit 5, paragrafët 1.3 dhe 1.5 të Ligjit numër 06/L-082.
Lidhja me prindin: kur përpunimi mbështetet në pëlqim dhe fëmija është nën 16 vjeç, nevojitet autorizimi i verifikuar i prindit ose kujdestarit, sipas nenit 7 të Ligjit numër 06/L-082. Pëlqimi mund të tërhiqet pa e bërë të paligjshëm përdorimin e mëparshëm.
Kontrata, faturat dhe ndihma: për zbatimin e kontratës dhe detyrimet ligjore. Lexojmë përdor interesin e vet të ligjshëm për sigurinë vetëm kur të drejtat e fëmijës nuk kanë përparësi.

Pjesëmarrja në një funksion jo të domosdoshëm nuk kushtëzon mësimin. Piloti nuk përdor të dhëna të ndjeshme, njohje fytyre ose njohje zëri.

5. Si përdoren të dhënat

për të krijuar llogarinë dhe profilin mësimor;
për të ruajtur progresin dhe për të përshtatur ushtrimet;
për t’i treguar progresin prindit ose mësuesit të autorizuar;
për të menaxhuar shkollat, klasat dhe qasjen;
për siguri, parandalim abuzimi, mbështetje dhe rikthim shërbimi;
për raportin e pilotit vetëm me rezultate të përmbledhura dhe të anonimizuara; të dhënat e punës fshihen jo më vonë se 90 ditë pas pranimit të raportit nga Komuna;
për detyrime ligjore, kontabilitet dhe kërkesa të ligjshme.

6. Fëmijët, prindërit dhe shkolla

Nxënësi i klasës së parë nuk hap kontratë dhe nuk jep vetë pëlqim për shërbimin. Shkolla krijon profilin vetëm pas vendimit të dokumentuar të Komunës dhe pasi familja të marrë këtë njoftim.

Nëse Komuna zgjedh pëlqimin si bazë ligjore, shkolla duhet të verifikojë prindin ose kujdestarin para aktivizimit. Një shenjë e thjeshtë në ekran nuk mjafton si provë e përgjegjësisë prindërore.

Procedura që mbyll menjëherë qasjen pas largimit nga shkolla, ndërrimit të klasës ose përfundimit të pilotit është ndërtuar në kod. Para fillimit real, ajo duhet të aktivizohet dhe të provohet plotësisht në sistemin e synuar. Pastaj zbatohen afatet e fshirjes në pjesën 9.

7. Kush mund t’i shohë të dhënat

mësuesi dhe administratori i autorizuar i shkollës;
prindi ose kujdestari i lidhur dhe i verifikuar;
vetëm personeli i autorizuar i Lexojmë kur nevojitet për funksionim, ndihmë, siguri ose fshirje;
Supabase Pte. Ltd., kompani me seli në Singapor, për llogaritë dhe bazën e të dhënave. Projekti i synuar ruhet në Irlandë. Supabase mund të përdorë personel dhe nën-përpunues në vende të tjera;
Vercel Inc., kompani me seli në Shtetet e Bashkuara të Amerikës, për publikimin e aplikacionit dhe regjistrat teknikë. Vercel mund të përdorë nën-përpunues në vende të tjera;
autoritetet publike vetëm kur ekziston kërkesë e ligjshme.

Ofruesi i postës elektronike për prindërit nuk është zgjedhur ende. Posta me të dhëna të prindit nuk aktivizohet derisa ofruesi të emërtohet, kontrollohet dhe shtohet këtu. Asnjë marrës nuk lejohet t’i përdorë të dhënat e fëmijës për reklama.

8. Kontratat dhe dërgimi jashtë Kosovës

Komuna duhet të lidhë me Lexojmë një marrëveshje me shkrim për përpunimin e të dhënave. Ajo duhet të lejojë me shkrim edhe Supabase, Vercel dhe çdo ofrues tjetër. Lexojmë duhet t’u vendosë ofruesve të vet të njëjtat detyrime të mbrojtjes.

Marrëveshja e përpunimit të të dhënave e Supabase bëhet pjesë e kushteve të llogarisë pa pasur nevojë për nënshkrim në letër. Para pilotit duhet të kontrollohet që mbajtësi juridik i llogarisë është LEXOJMË SH.P.K.

Marrëveshja e përpunimit të të dhënave e Vercel vlen vetëm për tarifat me pagesë Pro dhe Enterprise. Projekti i publikuar i Lexojmë është sot në tarifën falas Hobby. Sipas kushteve të Vercel, tarifa Hobby lejohet vetëm për përdorim personal ose jotregtar. Kushtet lejojnë edhe përdorimin e përmbajtjes për trajnimin e modeleve, nëse ky përdorim nuk çaktivizohet.

Për këtë arsye tarifa Hobby nuk lejohet për pilotin me fëmijë. Para pilotit duhet kaluar në një tarifë të përshtatshme me pagesë, duhet çaktivizuar përdorimi për trajnimin e modeleve dhe duhet kontrolluar marrëveshja me emrin juridik të Lexojmë. Zgjidhja tjetër është zëvendësimi i Vercel me një ofrues të miratuar.

Para dërgimit jashtë Kosovës, Komuna dhe Lexojmë duhet të kontrollojnë vendimin numër 22/2025 të Agjencisë për Informim dhe Privatësi. Irlanda është në listën e vendeve me mbrojtje të duhur. Për një ofrues në Shtetet e Bashkuara të Amerikës duhet të kontrollohet certifikimi i tij aktual sipas Kornizës së Privatësisë së të Dhënave ndërmjet Bashkimit Evropian dhe Shteteve të Bashkuara të Amerikës. Kur një vend ose marrës nuk mbulohet nga vendimi, duhet të merret paraprakisht autorizimi i Agjencisë sipas nenit 49 të Ligjit numër 06/L-082 dhe të dokumentohen masat mbrojtëse. Miratimi i Komunës ose kushtet e ofruesit nuk e zëvendësojnë këtë autorizim.

9. Afatet e ruajtjes dhe fshirjes

Ligji numër 06/L-082 nuk jep një numër të vetëm ditësh për të dhënat e mësimit. Ai kërkon fshirje, shkatërrim, bllokim ose anonimizim sapo të përfundojë qëllimi. Prandaj piloti përdor këto afate maksimale:

Kodi burimor tani zbaton automatikisht afatet për fëmijët, llogaritë e të rriturve, ftesat, regjistrat e hyrjes, provat dhe tabletin. Kjo bëhet aktive në sistemin e publikuar vetëm pasi të jetë zbatuar migrimi 0018, të jetë aktivizuar puna e përditshme dhe të jetë provuar me të dhëna testuese. Kopjet rezervë janë jashtë aplikacionit: ofruesi duhet të vendoset dhe të provohet veçmas me kufirin prej 30 ditësh.

Profili i fëmijës, progresi, përgjigjet dhe testet

Afati: Gjatë pjesëmarrjes. Fshirje ose anonimizim i pakthyeshëm jo më vonë se 90 ditë pas largimit nga piloti ose përfundimit të pilotit.

Pse: Afat maksimal i zgjedhur për pilotin sipas parimit të kufizimit të ruajtjes; ligji nuk cakton numër të posaçëm ditësh.

Lidhja me shkollën, klasën dhe kodi i hyrjes së fëmijës

Afati: Qasja çaktivizohet menjëherë pas largimit. Të dhënat personale të lidhura fshihen brenda 90 ditësh.

Pse: Afat maksimal i zgjedhur për pilotin sipas parimit të kufizimit të ruajtjes.

Ftesa për lidhjen e prindit me fëmijën

Afati: Lidhja e ftesës skadon pas 24 orësh. Adresa e postës elektronike dhe sekreti i ftesës fshihen ose anonimizohen brenda 30 ditësh pas pranimit, anulimit ose skadimit.

Pse: Afat maksimal i zgjedhur për pilotin sipas parimit të minimizimit.

Sesioni i hyrjes dhe skedari i domosdoshëm në pajisje

Afati: Sesioni teknik skadon jo më vonë se pas 12 orësh dhe hiqet menjëherë pas daljes ose ndërrimit të përdoruesit. Aplikacioni bllokohet automatikisht pas 15 minutash pa veprim.

Pse: Kufij teknikë të zgjedhur për pilotin. Bllokimi 15-minutësh është kusht sigurie i projektit, jo afat i caktuar nga ligji.

Kopja lokale e profilit dhe progresit në pajisjen e shkollës

Afati: Hiqet automatikisht pas daljes, ndërrimit të përdoruesit ose 15 minutash pa veprim. Kur pajisja kthehet, shkolla e kontrollon përsëri. Para përdorimit real, kjo duhet të provohet në çdo lloj tableti të shkollës.

Pse: Rregull i zgjedhur për pajisjet e përbashkëta. Shkolla duhet ta përfshijë pastrimin në procedurën e vet.

Llogaritë e mësuesve, administratorëve dhe prindërve

Afati: Qasja mbyllet menjëherë kur roli ose lidhja përfundon. Të dhënat e llogarisë fshihen ose anonimizohen jo më vonë se 90 ditë pas mbylljes, përveç provave që duhet të ruhen sipas një detyrimi të dokumentuar.

Pse: Afat maksimal i zgjedhur për pilotin sipas kufizimit të ruajtjes dhe nevojës për mbyllje të kontrolluar të qasjes.

Tentimet e hyrjes, gabimet dhe regjistrat e zakonshëm teknikë

Afati: Jo më shumë se 90 ditë. Nëse ka incident ose kërkesë ligjore, vetëm regjistrat e nevojshëm bllokohen deri në mbylljen e rastit dhe pastaj fshihen.

Pse: Afat maksimal i zgjedhur për zbulimin e gabimeve dhe keqpërdorimit.

Protokollet e qasjes fizike në të dhëna dhe pajisjet e teknologjisë së informacionit dhe komunikimit

Afati: Të paktën 12 muaj.

Pse: Afat minimal nga neni 8, paragrafi 3 i Rregullores numër 05/2022 për masat e sigurisë gjatë përpunimit të të dhënave personale. Ky rregull nuk vlen automatikisht për çdo regjistër të aplikacionit.

Dëshmia e autorizimit prindëror dhe versionet e pranuara

Afati: Gjatë pjesëmarrjes dhe 12 muaj pas përfundimit të saj. Adresa e internetit e pajisjes hiqet më herët kur nuk nevojitet më për siguri.

Pse: Afat maksimal i zgjedhur për të provuar ligjshmërinë pa mbajtur të dhëna të fëmijës për kohë të tepërt.

Kërkesat për ndihmë

Afati: 12 muaj pas mbylljes së kërkesës.

Pse: Afat maksimal i zgjedhur për ndjekjen e problemit.

Dosjet e incidenteve të sigurisë

Afati: Vetëm të dhënat e nevojshme ruhen deri në mbylljen e incidentit dhe të çdo procedure ligjore. Pastaj fshihen brenda 30 ditësh, përveç kur një ligj i dokumentuar kërkon më gjatë.

Pse: Afat i lidhur me rastin konkret; nuk përdoret si arsye për të mbajtur gjithë progresin e fëmijës.

Vërtetimet e fshirjes

Afati: 12 muaj pas vërtetimit. Vërtetimi përmban vetëm numrin e kërkesës, kategoritë e fshira, sistemet, datën dhe personat kontrollues, jo përmbajtjen mësimore.

Pse: Afat maksimal i zgjedhur për të dëshmuar se fshirja është kryer.

Kopjet rezervë

Afati: Të dhënat hiqen menjëherë nga sistemi aktiv. Kopjet e mbetura skadojnë brenda 30 ditësh dhe nuk rikthehen për përdorim normal.

Pse: Afat maksimal i zgjedhur për ciklin e kopjeve rezervë.

Faturat dhe dokumentet tatimore

Afati: Afati varet nga lloji i dokumentit. Dokumentet tatimore ruhen zakonisht të paktën 6 vjet pas periudhës tatimore. Librat e kontabilitetit dhe disa të dhëna për shërbimet elektronike mund të kërkojnë 10 vjet. Dëshmitë e kontabilitetit kërkojnë të paktën 5 vjet. Kategoria e saktë duhet të konfirmohet para pilotit. Këto dokumente nuk përfshijnë profilin ose progresin e fëmijës.

Pse: Ligji numër 08/L-257 për administrimin e procedurave tatimore dhe Ligji numër 06/L-032 për kontabilitetin, raportimin financiar dhe auditimin.

Statistikat që janë bërë vërtet anonime mund të ruhen më gjatë, sepse nuk mund të lidhen më me një fëmijë. Kur një ligj ose gjykatë kërkon ruajtje më të gjatë, të dhënat bllokohen, përdoren vetëm për atë rast dhe fshihen pasi detyrimi të mbarojë.

10. Si kërkohet qasja, korrigjimi ose fshirja

Prindi, kujdestari ose personi tjetër me të drejtë mund të kërkojë informacion, kopje, korrigjim, fshirje, kufizim, kundërshtim ose transferim të të dhënave. Kur përdoret pëlqimi, ai mund të tërhiqet. Kërkesa dërgohet te naim.behlulaj@rks-gov.net dhe mund të dërgohet në kopje te info@lexojme.com.

Identiteti dhe e drejta mbi profilin kontrollohen para dhënies ose fshirjes së të dhënave. Përgjigjja jepet pa vonesë dhe zakonisht brenda një muaji. Vetëm kur kërkesa është e ndërlikuar, afati mund të zgjatet sipas ligjit dhe kërkuesi njoftohet brenda muajit të parë.

Fëmija mund t’i kërkojë ndihmë prindit, kujdestarit, mësuesit ose një të rrituri të besuar. Ankesa mund t’i dërgohet Agjencisë për Informim dhe Privatësi, Rruga Zejnel Salihu numër 22, 10000 Prishtinë, Kosovë, përmes faqes aip.rks-gov.net.

11. Si kryhet fshirja

Procedura e ndërtuar në kod mbyll qasjen sapo shkolla njofton largimin ose sapo miratohet një kërkesë e vlefshme. Të dhënat hiqen nga sistemi aktiv brenda një muaji, përveç rastit kur Komuna duhet t’i eksportojë ose korrigjojë. Edhe atëherë zbatohet kufiri përfundimtar prej 90 ditësh.

Për një fëmijë të shkollës, Lexojmë nuk vendos vetëm. Komuna kontrollon kërkesën dhe i jep udhëzim Lexojmë. Kodi kërkon dy persona të ndryshëm të autorizuar për të nisur afatin. Pas kësaj, puna e përditshme fshin automatikisht të dhënat kur mbaron afati. Para pilotit duhen zbatuar migrimi dhe puna e përditshme në sistemin e synuar. Duhet të provohen edhe fshirja te ofruesi i llogarive dhe skadimi i kopjeve rezervë brenda 30 ditësh.

Nëse ka mosmarrëveshje mes Komunës dhe Lexojmë, ose nëse Lexojmë e ndërpret veprimtarinë e përpunimit, Lexojmë ia kthen menjëherë Komunës të gjitha të dhënat. Lexojmë nuk mban kopje dhe nuk vazhdon përpunimin, sipas nenit 32, paragrafët 4 dhe 5 të Ligjit numër 06/L-082.

12. Siguria dhe incidentet

Kodi i përgatitur i Lexojmë përdor role të ndara, sesione të mbrojtura, kufizim të tentimeve dhe qasje nga serveri. Sekreti i ftesës së prindit ruhet në formë të pakthyeshme. Por kodi i nxënësit ruhet ende i lexueshëm në bazë dhe mbetet në adresën e shfletuesit. Kjo duhet të korrigjohet para të dhënave reale. Bartja në internet dhe ruajtja, përfshirë kopjet rezervë, duhet të jenë të koduara. Të gjitha masat duhet të vendosen në sistemin e publikuar dhe të testohen përsëri.

Asnjë sistem nuk është plotësisht pa rrezik. Incidenti hetohet dhe dokumentohet. Kur mund të rrezikojë njerëzit, Komuna e njofton Agjencinë për Informim dhe Privatësi brenda 72 orësh nga marrja e dijenisë. Kur rreziku është i lartë, njoftohen edhe familjet pa vonesë.

13. Përshtatja automatike dhe ndryshimet

Aplikacioni mund të zgjedhë ushtrimin tjetër sipas përgjigjeve. Ky proces nuk vendos nota zyrtare, pranimin në shkollë ose ndonjë të drejtë ligjore. Mësuesi mbetet përgjegjës për vendimet arsimore.

Ndryshimi i rëndësishëm i qëllimit, ofruesit, vendit ose afatit kërkon njoftim të ri para se ndryshimi të përdoret. Ky dokument mban datën dhe versionin e vet, që të dihet saktë cili tekst ka vlejtur.